夢的解析, 神, 過於喧囂的孤獨, 神不在的星期三, 安米德:彷徨少年時, 極北, 人造衛星情人

夢的解析: 佛洛伊德嘅思想比我想像中理性、有條理[sosad] 先前以為佢真係一個痴線佬[sosad] 本書最中心嘅論點就係「夢係慾求嘅滿足」。之後就根據觀察,解釋夢嘅工作、來源,最後帶出佢嘅潛意識、前意識、意識系統。最重要嘅係,佢係有prove 到嘅,只係佢嘅proof係base on佢創立嘅精神分析,呢點亦令佢嘅夢理論唔可信。 我認為睇書冇必要完全信哂內容,呢本就更加唔需要信哂,咁就會發現呢本書其實好有趣,想像力驚人,「理論」本身亦好吸引。#good# 神: 董啟章新書,係上一本《心》嘅姊妹篇,所以主題都係講作者本人對現今香港社會狀況嘅睇法同現時心境。 全書分左形、影、神三章,三章都係第一人稱寫成,就當中嘅「我」係不同人。主角分別係,自稱做「形」嘅情慾作家、「形」嘅學生「影」、「形」嘅兒子嘅補習老師「神」。 劇情方面當然要提下第三章裡面,「形」同「神」玩嘅一個遊戲,大家會除哂衫,赤裸裸咁相處:P 不過冇性:o) 而係作為一個實驗?_? 其他內容就好似「心」咁,好多瑣碎嘢,好多對話,一d對事嘅睇法,而莊子、陶淵明就係核心思想。 如果係董啟章嘅讀者,要一睇,「形」就係董嘅化身,中間又提到《物種始源》:O 過於喧囂的孤獨: 講一個做紙張垃圾回收嘅人嘅故事。令我最印象最深嘅就係書入面唔同嘅人物,應該就係序入面譯做嘅「中魔的人」。小人物生活艱苦,但從另一個角度面對生活,充滿愉快。就如主角,喺臭氣沖天,周圍老鼠嘅回收站做左幾十年廢紙回收,不覺間透過閱讀獲得大量知識,更愛上自己工作,將呢,幾十形容為love story。行為誇張得黎有d荒旦,唔知算唔算帶有魔幻寫實色彩 但全書冇咩劇情,形容出黎嘅畫面有d悶,我覺得麻麻#cn# 安米德: 一開始已經覺得幾吸引#good# 講一個細路成長為青年嘅故事。主角喺不同階段都面對一d迷惘,而身邊就會出現一個人教佢要尋找自我嘅人。 全書好多金句式嘅說話,而背後嘅哲學相信係黎自尼采。例如,摒棄世俗嘅道德,唔隨波逐流,又例如一d善惡並存,或係選擇孤獨呀,成就自我等。 可惜我認為尾二嗰章開始就爛,而我亦唔認同佢背後呢套哲學,同佢描述為成功找到自我嘅人嘅模樣。xx( 但都值得一睇,可能會為彷徨嘅人帶黎一d方向#:)#fs 極北: 係講述一個文明被破壞嘅時代,主角尋找希望嘅經歷。主角嘅父親好耐以前主動離開現代文明,搬到北面嘅一個嚴寒之地定居,重新建立一個原始城市,而主角就喺呢個城市出生。 而故事嘅時間點,就係一個被戰爭破壞左現代文明嘅時代。連主角父親所建立嘅城市都被受牽連,變成廢城,整個城市嘅人都死清,剩低主角一個自己生活。故事開頭,主角就發現其他生還者,然後同佢一齊生活。但不久後呢位生還者就過世,令主角萌生自殺嘅念頭。喺佢自殺之際,突然有一架飛機經過,呢個係主角幾十年黎第一次親眼見到飛機,亦因此燃起佢生存嘅希望,佢就此踏上尋找文明,重返人羣嘅旅程。 本書係村上推薦,所以先睇,但老實講,有d悶[sosad] 搞好耐先知道故事個背景[sosad] – By Mr. Wub 6/2017 Advertisements Continue reading 夢的解析, 神, 過於喧囂的孤獨, 神不在的星期三, 安米德:彷徨少年時, 極北, 人造衛星情人

世界末日與冷酷異境 review

讀村上春樹《世界末日與冷酷異境》 如果要筆者推介一本村上春樹的小說,那一定會是《世界末日與冷酷異境》。因為無論劇情和內涵,都是個人認為最精彩而豐富。 故事以兩條主線推展,單數章節為「冷酷異境」,雙數則為「世界末日」,可理解為兩個不同的世界,不同的故事。 「冷酷異境」: 「冷酷異境」裡面有兩個敵對機構,分別為「組織」和「工廠」。「組織」是負責資訊加密,而其對頭人「工廠」的工作則是破解密碼。主角「我」一直認為自己只是「組織」中的普通成員,卻不知情地牽涉在「組織」以前的一個研究計劃當中,並為其中關鍵人物。因研究計劃的發展,「我」無奈地被捲入兩個勢力的爭鬥中,被迫面對「世界末日」的來臨。 「世界末日」: 主角「我」由故事開始就進入了一個被高牆圍住的地方,稱為「街」。「門房」定下規則,每個人都必須與他的「影子」分離,才可在「街」生活,而「我」也被迫放棄「影子」。「街」是一個絕對和諧的地方,沒有爭鬥,每個人都和平共處。可是「我」感覺到「街」同時是一個不對勁、不完全的地方,所以「我」決定從「門房」手上救出「影子」,並逃出「世界末日」。 「冷酷異境」和「世界末日」當然不是亳無關連。讀者會發現兩個世界會透過某些物件連繫在一起,在故事的中段,兩個世界的關係就會明朗化。兩個獨立的故事交織成一個立體的故事,兩者互相影響。小說大量使用象徵和隱喻,為村上世界觀寫下一個雛型,要進入村上小說世界,《世界末日與冷酷異境》絕對是不可或缺。 如果讀者睇過其他書評,都會知道呢本小說絕對唔易讀。事實上,筆者讀第一次嘅時侯,都完全唔知佢噏緊乜。不過,呢本小說嘅魅力就在於,睇唔明都覺得好正! 從《世界末日與冷酷異境》看村上春樹的世界觀 《世界末日與冷酷異境》是村上第一本結構宏大的小說,當中隱藏著他一直以來所抱有的世界觀。可是,故事結構複雜,晦澀難明,讀後可能仍然一頭霧水。在此,筆者提供一種解讀方法。若要理解故事背後的想法,筆者認為有幾個重要的象徵與隱喻需要談及:「古老的夢」、「獸」、「影子」、「心」、「黑鬼」。 「古老的夢」和「獸」: 「古老的夢」和「獸」出現在「世界末日」,筆者會將它們分別解作對別人的回憶和以前的自己。「古老的夢」的容器是「獸」的「獨角」。「獸」載著記憶,直到無法承受,然後死去,「古老的夢」就留存在「獨角」裡面。而「我」,身為「夢讀」,則負責讀取這些它們,再釋放出去。 「世界末日」是「我」的意識世界,「古老的夢」在「世界末日」存在即是說,「我」對別人的記憶存在於「我」的意識中。「獸」的死,即是說記憶會隨時間而淡忘,只留存在「獨角」裡。「我」留在「街」讀夢,從而釋放裡面的記憶,意思即是放棄,在「街」生存的代價是要放棄對其他人的記憶。 那為何「獸」要死?「我」亦曾問及,為甚麼「獸」要死去?又為何沒有人救「獸」呢?而「街」裡的人則回答說,這是沒有解釋,亦無可避免的。這牽涉到村上小說的一貫主題──孤獨與疏離。在《挪威的森林》、《舞、舞、舞》、《人造衛星情人》、《沒有色彩的多崎作和他的巡禮之年》等,主角都被其他人離棄,別人只在人生的某個階段與自己相遇,然後離去,甚麼都沒有留下,剩下自己孤伶伶一個。在這裡,脆弱的「獸」,可解作以前的自己,載著過去與別人的回憶,無力地死去。「獸」的出生,然後死去,不斷的循環,就象徵著人生各階段的開始和消逝,最後留下的只有自己一個。 「影子」: 同樣出現在「世界末日」中,筆者會將「影子」解作記憶與過去。與「古老的夢」的不同之處,是「影子」是自己的另一半,自己的過去不單是單純的記憶,是有血有肉的、有生命的。 「街」上的人都需要放棄「影子」,例如老兵,他們放棄的原因是想藉此逃離戰爭的陰霾,類似的情境在《海邊的卡夫卡》亦出現過。放棄影子,令影子死去,與過去劃清界線,目的是進入「和諧」的世界。當然,村上的世界觀是說,我們不應該放棄影子,沒有影子則是不完全的人,因為從故事看得出,「街」雖然是和諧、沒有爭鬥的世界,但這樣的世界同樣失去了情感。這也是「街」被命名為「世界末日」的原因。老兵在街裡面出現,筆者相信絕非偶然,除了有反戰的意思,更加隱藏著村上某些政治立場。 故事的最後,「我」雖然選擇留在「街」,卻沒有放棄「影子」,而決定救出並放走「影子」,可以理解為決心與自己的過去一起存在,卻不活在過去的陰霾下,擁有全新的人生。 「心」: 筆者認為可理解為一般小說對「心」的含意,即是情感、欲望。在「世界末日」裡,「街」裡的人都沒有「心」,而「我」的「心」亦會從「影子」死去的時侯隨之死去。村上認為,沒有「影子」的人,即放棄「過去」的人,同時亦會是失去感情,沒有「心」的人。而人若沒有「心」,無論世界多麼和諧,甚或人和世界變成永恆的存在,一切都只是沒有意義,是一個永恆的末日。 在村上的世界裡面,「心」失去後,不是無可救藥,是可以重新找回的,而方法就是找回記憶。「我」就是透過讀夢,讀到屬於圖書館女孩的「古老的夢」,令女孩找回「心」,並雙雙留在「世界末日」生活。這裡,我們也可看得出一個老土又童話式的信念,就是透過愛,可重新建立幸福。 「黑鬼」: 在「冷酷異境」的故事裡,並沒有交待何謂「黑鬼」,描述他們因不能接觸光而生活在地底,又在地底興建聖壇,會殺死入侵地底世界的人類。筆者認為可將「黑鬼」宏觀地理解為邪惡的、不可掌握的事物或勢力。在「冷酷異境」裡面,有兩個人類勢力的爭鬥,雙方因互相競爭而盲目地發展科技。「我」雖然在其中一方,但只是被利用。而「我」是打從心底裡面不認同這兩個勢力的,只是被迫捲入鬥爭中。兩個勢力相爭的結果,就是讓邪惡的第三勢力──「黑鬼」有機可乘。 在《尋羊冒險記》和《舞、舞、舞》裡面,可以看出村上有反資本、反盲目競爭的思想主義,在此亦可以看得出類似想法。人類不斷追求進步,不惜利用和放棄「人」本身。故事裡面,博士因純粹的科學求知精神發展技術,「組織」和「工廠」為競爭實踐科技,但不論原因為何,「我」都成為了故事的受害者。「黑鬼」的來臨,更會是人類將共同面對的後果。 當然,筆者絕對不是認為只有一種解法,因為如果符號只指向一個簡單明確的意指,我們就不需要抽象的符號。 如果讀者覺得,睇本小說啫,咁都要諗嘢諗餐死?筆者絕對認同呀,所以,讀完冇諗法嘅,咪由得佢囉!無聊冇嘢做嘅,先再思考吓囉! – by Lok Yin Chan (MR.WUB) 14/3/2017 Continue reading 世界末日與冷酷異境 review

世界末日與冷酷異境

睇緊「冷酷異境 世界末日」,小弟才疏學淺,睇得有啲辛苦。 – by 服部平次 世界末日與冷酷異境有好多隱喻,好難讀,但係真係好正,不論個故事同世界觀 呢本野我睇第一次嘅時候都係乜都唔明,不過已經俾劇情深深吸引。睇第二次嗰時先知講乜 難明同睇唔明嘅位可以skip左佢先,睇小說睇得辛苦真係冇乜謂。睇完一次覺得有個大picture同覺得值得睇番細節,先再細細重讀 文學小說嘅價值唔單止在於劇情 – by Mr.WUB 巴打記唔記得我 上個post就係因為你講完而去睇 真係好鍾意 最鍾意呢段: 他們有時候會挖洞,大概和我專心下棋原理上一樣吧。既沒有甚麼意義,也不會到達哪裡。不過這些事都無所謂。因為誰都不需要甚麼意義,也沒有人想要到達甚麼地方。我們在這裡大家在各自繼續挖著純粹的洞穴。沒有目的的行為,沒有進步的努力,到達不了甚麼地方的步行。 世界末日寫咗個好多人渴望嘅一個無憎恨無鬥爭嘅世界,但無憎恨無鬥爭即係連相反嘅嘢都無,無愛、無心等等。 世界末日深刻啲,但鍾意冷酷異境多啲 – by 嬌嬌女   可以討論一下呀,不過我嗰本借左俾人,只可以憑記憶講講 我認為有幾個重要嘅象徵同隱喻:古老的夢、影子、心、黑鬼、迴紋針 古老的夢:我會將佢解做對別人嘅記憶。古老的夢嘅容器係獸嘅獨角。獸吸收街上人失去嘅記憶,再死去。「我」問到,點解獸要死去?而街嘅人就答佢,冇得解亦無可避免。而「我」就負責讀取呢d記憶,再釋放出去。 世界末日係「我」嘅意識世界,咁即係話,「我」對別人嘅記憶存在於「我」嘅意識中,但係會隨時間而死去(當獸無法承受)。「我」要留喺街,就必需讀夢,從而釋放裡面嘅記憶。釋放嘅意思係放棄,要放棄對其他人嘅記憶先可以生存喺街。 影子:我會將影子解做記憶、過去。同古老的夢嘅唔同之處係,影子係我嘅另一半。街上嘅人都需要放棄影子,例如老兵,佢地放棄嘅原因係想逃避戰爭,呢點喺海邊的卡夫卡都出現過。放棄影子,令影子死去,就係為左進入「和諧」嘅世界。當然,村上嘅世界觀係話,唔應該放棄影子,冇左影子就唔會係完全嘅人,呢點可以從故事睇得出,而且街都被命名為「世界末日」。老兵喺街裡面出現,我相信絕非偶然,除左係反戰嘅意思,更加隱藏住村上某些政治立場。 故事嘅最後,「我」都係冇殺死到影子,只係放走影子,可以理解為與自己嘅過去一齊存在,卻冇活喺過去嘅陰霾下,擁有全新嘅人生。 心:我理解為一般小說嘅「心」嘅意思,即係情感、欲望嗰個意思。最值得講,就係村上認為,冇左影子,亦會失去心。而心,失去左後,係可以從新搵返。「我」就係透過讀夢,搵返嗰個女仔嗰記憶,而有返心。 黑鬼:黑鬼喺故事冇真正講係乜,只係生活喺地底,又殺人又起聖壇又盛。我將佢宏觀咁理解為邪惡嘅未知事物。喺冷酷異境裡面睇到有兩個人類勢力嘅爭鬥,「我」雖然喺其中一方,但係「我」只係被利用,而「我」打從心底入面唔認同呢兩個勢力,「我」只係被迫捲入事件。兩個勢力雙爭嘅結果,就係令邪惡嘅「黑鬼」侵入人類嘅世界。 喺尋冒險記裡面,可以睇得出村上有反資本主義嘅思想,我認為呢度到可以睇得出類似想法。人類不斷追求進步,不惜利用同放棄「人」本身,「我」就係成個故事嘅受害者。最終個後果,將會係「黑鬼」嘅來臨。 迴紋針:呢個其實我冇咩諗法,但係我認為可以從二戰時迴紋針喺挪威扮演嘅角色黎理解讀。 從整個故事睇,要睇「冷酷異境」同「世界末日」點樣互動。都有好多書評用對比嘅角度睇兩個世界嘅分別,而我比較著重互動上。 世界末日係「我」嘅意識世界,但係要留意返,博士係加左一條回路從而改動過「世界末日」,而改被改動過嘅位喺邊呢?我都係冇咩諗法,不過直覺上認為係在於「門房」,因為係門房迫「我」放棄「影子」同「心」。 另外一個互動,在於圖書館女孩,兩個世界都分別有個圖書館女孩,究竟有冇關係呢?「世界末日」裡面「我」讀夢讀到女孩嘅夢,而「冷酷異境」裡面「我」同女孩一齊望著獨角發光。唔理有冇關係,呢兩段都令我有極深刻嘅印象。 最後就係「歌」,歌一向係村上小說重要元素。歌係人生嘅一部分。喺「世界末日」,我就係透過「歌」諗起過去。而喺「冷酷異境」,「我」喺面臨末日來臨,都係選擇聽歌。PS:佢聽嘅係bob Dylan 嘅歌,亦係今屆諾貝爾文學獎得主。 村上嘅人生觀可以從結局睇到,亦係我最鍾意嘅部份。「我」最後冇從「世界末日」逃出去,亦留喺自己嘅意識裡面。呢個當然唔可以話係村上嘅人生觀,因為故事裡面,受「冷酷異境」劇情限制,「我」本唔可以逃出。而且兩個「我」,喺呢度係有矛盾。一個選擇唔逃離「世界末日」,一個唔捨得「冷酷異境」。唯一共通就係,無論對自己本身世界有幾多批判同不認同,都唔想放棄自己嘅世界。最後「我」留喺意識裡面,睇落帶有悲傷,但係「我」都喺裡面同圖書館女孩一齊,重新建立幸福。 – by Mr.WUB 3/2017 Continue reading 世界末日與冷酷異境

村上春樹

(村上春樹大家覺得邊本最好睇) 挪威的森林真係正嘅,但好多人為睇而睇,成個故事其實個結構好嚴謹,我自己覺得神係神在呢個位,但始終都係村春嘅入門作,村春嘅小說標誌性嘅都市孤獨感唔算好突出。《世界末日與冷酷異境》就真係好精彩,我自己認為係最好睇,覺得村春fans一定要睇呢本。 – by 關憶北 1973年的彈珠玩具 前段一路睇都悶悶地,去到揾到部彈珠機個度,睇到內心嘩一聲,覺得好正 – by 有村架純旦那 村上春樹冇全部睇晒 私底下最鍾意佢本短篇集「神的孩子在跳舞」 成個picture好靚 冇見過更靚 – by 五月街 睇緊村上春樹嘅 你說,寮國到底有什麼? 睇咗大概1/3 感覺似係佢自己隨意寫,一個普普通通嘅旅行紀錄。主要集中係當地文化同當地人生活習慣。如果唔係村上春樹,應該冇咩人想睇 – by 雪月花 我頭三係 多崎作 國境之南 挪威的森林 鍾意村上嘅長篇多過短篇 上面幾位巴講嘅沒有女人的男人們係我唯一唔鍾意嘅村上作 睇完挪威好鍾意,睇完國境之南爬咗頭 最近睇咗關於跑步覺得好好睇 寫佢咁多年長跑同寫作嘅生活 了解到佢嘅價值觀仲裝咗嘢落袋 覺得係fans必睇 – by 嬌嬌女 我最中意反而係談跑步 1Q84就中左伏 – by on77 我有提到呀,我都好鍾意呢本 呢本睇英文版,睇前特登睇埋Raymond Carver what we talk about when we talk about love 下本都係打算睇世界末日 識咗個英國朋友都係村上迷 佢最鍾意發條鳥同1Q84 – by 嬌嬌女 本身英文麻麻,但尼本係我唯一想試下看佢的英文版,因為村上真係中學就看到而家,所以看佢寫類似自傳的跑步同身為職業小說家,都覺得好好看,唔輸小說 – by on77 … Continue reading 村上春樹

村上春樹 小說篇

#0成人咸書目錄 小弟啱啱開始接觸己經迷上咗 暫時睇咗三本 挪威的森林 國境之南太陽之西 聽風的歌 最鐘意挪威的森林一開始講森林同井個一段 #2平丸一也 唔算睇左好多本 最愛係國境之南呢本 但老實講村上啲小說睇得多會發現其實有種村上味喺度 係種筆觸同用字 仲有情節嘅營造 唔可以話好唔好 但個人覺得睇得多會悶 所以幾推薦佢嘅短篇小說同埋散文 感覺上呢個先係佢嘅領域 好多細緻感情都寫得好好同好中 短篇小說集推薦螢火蟲 散文集推薦爵士群像 利申:早一兩年係村上迷 而家因為佢轉向左為翻譯小說迷 #12Mr.WUB 佢係個主題同思想咁多年都冇變過,更甚係裡面嘅象徵都成日重覆,好似井喺挪威的森林、發條鳥年代記、聽風的歌都有出現過;影子喺海邊的卡夫卡同世界末日與冷酷異境都用過;連角色意象羊男都喺尋羊冒險記、舞舞舞(不過呢個係尋羊下集)、圖書館奇譚集出現過 不過我又覺得睇得多或睇哂可以更透徹理解某d象徵嘅意義,更可以還原村上建構出黎嘅世界嘅全貌 #4李慧思 有無諗過其實你地都係被賴明珠迷 #9Morrissey 我一直以為人是慢慢變老的,其實不是,人是一瞬間變老的 #10馬料水三失男 國境之南 對於成長既失落描寫得好有味道 個種毒撚既寂寞,內向,冇人明白 既感覺好有共鳴 好似有唔少人屌賴明珠翻譯版差 利申:都係睇賴明珠版, 努力學習日文睇原版中 #11Mr.WUB 上年呢個時候左右迷左睇村上,而加睇哂佢d長篇,短篇雜文自傳都睇左幾本 最鍾意世界末日與冷酷異境、發條鳥年代記、挪威的森林、人造衛星情人 最唔鍾意就咁啱係樓上提到嘅國境之南太陽之西同1Q84 #13李慧思 睇左咁多本 最深刻係沒有色彩的多崎作 #14醉曖紅萬 反而覺得多崎作最悶 同沙羅段感情好平淡咁 無挪威森林咁深刻 #16Morrissey 最正都係世界末日與冷酷異境 #18睇轉倒西傻 淨係睇過 挪威的森林 沒有女人的男人們 1Q84 森林就好睇 1Q84 1,2幾好 但3麻麻 沒有女人的男人們都唔錯幾有共嗚 #20五月街 唔覺意見到, 上一上水俾嬌嬌女巴打睇下~ 同意樓上巴打講, 佢d小說睇多左有審美疲勞 不過對沉迷佢既人黎講, 風格統一係好事黎ge 我自己最鍾意一篇短篇- … Continue reading 村上春樹 小說篇